Den sangbongi tongku dao patindoangku angku daka’i tu andi’ pa’kaboro’ inaangku, kudaka’, apa tae’ kukabu’tui.
2
La millikna’ sia male sumalong lan lu kota, dio lu mintu’ batatta sia tana lapang, angku daka’i tu andi’ pa’kaboro’ inaangku; kudaka’, apa tae’ kukabu’tui.
3
Naapparanmo’ to ma’ronda’, tu sumalong lan lu kota iato, angku ma’kada kukua: Tae’raka mitiroi tu andi’ pa’kaboro’ inaangku?
4
Mane ra’pa’na lendu’ dio mai tau iato mai, kukabu’tuimi tu andi’ pa’kaboro’ inaangku. Kula’ka’imi, sia tae’ kurampananni male, ke tae’pi kubaai tama banuanna indo’ku, tama bilikna to padadiangku.
5
Umpalaona’ sumpa ussa’bu’ sanganna kijang sia donga birang dio lu padang, unnada’ikomi, e mintu’ anak dara Yerusalem, kumua da mipopengkilalai sia da mitundanni tu kamamaliran, ke tae’pi nasae kamoraianna.
To songlo’ male unnala baine la tama rampanan kapa’6
Apara ia tu sae dio mai padang aak, susito lentong rambu, ma’bau muru sia dupa sia mintu’ pebangki’ busarungngu’na to ma’balili?
7
Tiromi, iamote tu bulleanna Salomo, natikui annan pulona to lalong dio mai mintu’ lalongna to Israel.
8
Ma’pa’dang nasang sia manakkamo lan tananan ra’, pantan untakin pa’dangna belanna apa megiangan ke bongi.
9
Mangkamo tu datu Salomo unggaragan kalena misa’ bullean datu kayu Libanon.
10
Mintu’ lentongna salaka nagaragai sia sanderanna bulaan, o’koranna sampin lango-lango, na iatu lanna lu dibeloi sampin pa’kamasena mintu’ anak dara Yerusalem.
11
Tassu’komi, e mintu’ anak dara Sion. Tiroi tu datu Salomo, ma’makota, tu napasongkoranni indo’na, tonna tidukun tama rampanan kapa’, tonna allo kasendeanna penaanna datu.